दक्षिण कोरिया– नेपाल र कोरियाको अन्डर–१६ फुटबल टोलीबीच भएको मैत्रीपूर्ण खेल गोलरहित बराबरीमा सकिएको छ। दक्षिण कोरियाको फाजु एनएफसीको मैदानमा शनिबार भएको खेलमा उत्कृष्ट प्रदर्शन गर्दै नेपाली टोलीले कोरियालाई बराबरीमा रोकेको हो।
सेम्टेम्बरमा थाइल्यान्डमा हुने एएफसी यु १६ च्याम्पियनसिप २०१४ को तयारी गर्न दुई साताको अभ्यासका लागि कोरिया आएको नेपाली टोलीको प्रदर्शनबाट आफू सन्तुष्ट रहेको प्रशिक्षक बालगोपाल महर्जनले बताए।
सो प्रतियोगिताको सेमिफाइनल पुग्ने चार टोलीले चिलीमा हुने आउँदो युथ–१७ विश्वकपमा सहभागी हुन पाउनेछन्। 'कोरियाजस्तो सशक्त टिमलाई ड्रमा रोक्न सकियो, अब सेप्टेम्बरमा बैंककमा हुने यु–१६ च्याम्पियनसिपमा राम्रो प्रदर्शन गरी दोस्रो चरणमा पुग्ने लक्ष्य छ।'
कोरियाको फुटबल टोलीसँगको जस्तै खेल खेले विश्वकपमा नेपाली युवा टिम छानिन सक्ने उनको आशा थियो। शनिबारको खेलबाट टोली उत्साही भएको उनले जनाए।
यसअघि कोरियाको अन्डर सेभिन्टिन हाइस्कुलसँग खेलेको दुई खेलमा एउटामा नेपाल एक गोलले विजयी भएको थियो भने अर्को दुई दुई गोलको बराबरीमा सकिएको थियो।
शनिबारको खेलमा नेपालका तर्फबाट बिमल घर्तीमगर, सुनिल बल, अनिल राई, सन्जोग राई, विकास थापा, किरण, आकाश थापा, अनन्त, अमित तामाङ, दिनेश र रोमन मैदानमा उत्रिएका थिए। अन्जन विष्ट र हेमन्त थापामगर घाइते भएकाले खेल्न सकेन।
नेपाली खेलाडीलाई हौसला दिन कोरियाका लागि नेपाली राजदूत कमानसिंह लामा, श्रम सहचारी अनिल गुरुङ, एनआर एन कोरियाका अध्यक्ष विनोद कुँवर, भूतपूर्व खेलाडी संघका अध्यक्ष रवि महर्जनलगायत खेल हेर्न आएका थिए।
टिम व्यवस्थापक दिनेश व्यञ्जनकारसहित ३० जनाको टोली जुलाई ७ मा कोरिया आएको हो। कोरियाबाट जुलाइ २१ मा फर्किएपछि टोलीले कतारको दोहामा एक साता र बेल्जियममा २ साता अभ्यास गर्ने महर्जनले जनाए ।