सरकारको नीति तथा कार्यक्रम आज ल्याइँदै
Admin / 2014-06-29 02:51:53
नेपाल ब्युरो–असार १५, काठमाडौँ ।
सरकारको नीति तथा कार्यक्रम आज ल्याइने भएको छ ।
व्यवस्थापिका संसदको आजको बैठकमा राष्ट्रपति डा रामवरण यादवले सरकारको नीति तथा कार्यक्रम प्रस्तुत गर्नुहुने भएको छ ।
त्यसका लागि संविधानसभा भवन नयाँ बानेश्वरमा दिउँसो ३ बजे संसदको बैठक बस्ने संसद सचिवालयले जनाएको छ । नीति तथा कार्यक्रम संसदले पारित गरेपछि त्यसैको आधारमा सरकारले आगामी आर्थिक वर्षको बजेट ल्याउनेछ ।
नीति तथा कार्यक्रममा सरकारले कृषिको आधुनिकीकरण, उर्जा संकट समाधान, बेरोजगारी हटाउन केन्द्रीत हुने गरी नीति तथा कार्यक्रम आउने यसअघि नै बताइ सकेको छ ।
संसदमा राष्ट्रपतिबाट हुने विशेष सम्बोधनलाई मध्यनजर गर्दै आज सभासद्हरुलाई औपचारिक पोशाकमा ३ बजे अघि नै उपस्थित भइसक्न निर्देशन दिइएको छ । दोस्रो संविधानसभा गठन भएपछि राष्ट्रपति डा यादवको यो पहिलो सम्बोधन हुनेछ ।
उहाँको विशेष सम्बोधन समारोहमा विभिन्न कुटनीतिक नियोगका प्रमुख, विभिन्न क्षेत्रका उच्च अधिकारी तथा विशिष्ट पाहुनाहरुलाई निमन्त्रण गरिएको संसद सचिवालयले जनाएको छ ।
यसैवीच मन्त्रिपरिषद्को बैठकले सरकारको नीति तथा कार्यक्रमलाई स्वीकृति दिएको छ । सिंहदरबारमा आज बिहान बसेको मन्त्रिपरिषद्को बैठकले सरकारको नीति तथा कार्यक्रमलाई स्वीकृति प्रदान गर्ने निर्णय गरेको हो ।
कोइराला उपचारका लागि अमेरिकामा रहेकाले नेपालको पहिलो पटक कार्यबाहक प्रधानमन्त्री बामदेव गौतमले मन्त्रिपरिषद् बैठक बोलाउनुभएको हो ।
प्रकाशित मिति: 2014-06-29 02:51:53
प्रतिक्रिया: