सर्वपक्षीय राजनीतिक सम्मेलन भदौ ३१ गते गर्ने सहमति
Admin / 2014-09-12 07:55:19
नेपाल ब्युरो– भदौ २७, काठमाडौ ।
सर्वदलीय राजनीतिक सम्मेलन आगामी भदौ ३१ गते हुने भएको छ ।
नेकपा–माओवादीले माग गर्दै आएको सर्वदलीय राजनीतिक सम्मेलन भदौ ३१ गते हुने सहमति भएको हो ।
नेपाली कांग्रेस, एमाले, एकीकृत माओवादी र नेकपा–माओवादीका नेताहरु रहेको कार्यदलको आज बसेको बैठकले सम्मेलनको भादै ३१ बिहान ९ बजेका लागि मिति तोेकेको हो ।
यसअघि सम्मेलन कहिले बोलाउने भन्ने विषयमा चार दलबीच मतभेद रहँदै आएको थियो । प्रधानमन्त्री सुशील कोइराला भदौ–३ गते उपचारका लागि अमेरिका जाने भएपछि कांग्रेसले भदौ मसान्त भित्रै र नेकपा–माओवादीले असोज–५ गते सम्मेलनको प्रस्ताव गर्दै आएको थियो । हिजो बसेको प्रमुख नेताहरुको बैठकमा मितिको टृुङगो लाग्न नसकेपछि सम्मेलन अनिश्चित हुन पुगेको थियो ।
कार्यदलमा रहेका एक नेताका अनुसार सम्मेलनमा संविधानसभा रहेका सबै दलको सहभागिता रहने छ । संविधानसभा बाहिर रहेका नेकपा–माओवादी सहित अन्य कुन कुन दललाई सम्मेलनमा बोलाउने बारे आज र भोलिमा टुङगो गरिने बताईएको छ । सरकारको आयोजनामा गरिने सो सम्मेलनको स्थान पनि टुङगो लाग्न बाँकी छ ।
सम्मेलनमा संविधान निर्माण सम्बन्धी विषयहरुबारे मुख्य रुपमा छलफल हुनेछ । सहमति हुन नसकेका साशकीय स्वरुप, संघीयता, निर्वाचन प्रणाली लगायतका विषयमा छलफल गरिने छ ।
प्रकाशित मिति: 2014-09-12 07:55:19
प्रतिक्रिया: