सातवुँदे सहमतिप्रति राष्ट्रपतिको गम्भीर आपत्ति
Admin / 2014-06-01 07:15:33
काठमाडौं । राष्ट्रपति डा. रामवरण यादवले सरकार गठनको बेला नेपाली कांग्रेस र एमाललेबीच भएको सातवुँदे सहमतिप्रति गम्भीर आपत्ति जनाएका छन् ।
राष्ट्रपति र उपराष्ट्रपतिलाई संसदबाट अनुमोदन गर्ने सहमतिले राष्ट्रपति संस्थाको अपमान भएको भन्दै यादवले दलहरुले आफ्नो कमजोरी ढाक्न राष्ट्राध्यक्षको टाउकोमा दोष थोपरेको टिप्पणी गरे । वीपी जन्म शताव्दी स्मारक मुद्रा बिमोचन कार्यक्रममा राष्ट्रपति यादवले भने-’राष्ट्राध्यक्ष कुनै पार्टी विशेषको हुदैन, तर मलाई कांग्रेसको बिल्ला भिराइएकोमा दुःख लागेको छ । यो सवाल व्यक्तिको होइन राष्ट्राध्यक्षको हो ।’
समयमा संविधान बनाउन नसक्ने दलहरुले आफ्नो कमजोरी ढाकछोप गर्न संवैधानिक रुपमा रहेको राष्ट्राध्यक्षको टाउकोमा दोष थोपर्न खोजेको भन्दै राष्ट्रपतिले आक्रोश व्यक्त गरे ।
आफू राष्ट्रपतिको कुर्सीमा जनताको आशिर्वादले आएको भन्दै राष्ट्रपति यादवले संस्थालाई स्वार्थ अनुकुल विवादमा नतान्न आग्रह समेत गरेका छन् ।
सुशील कोइरालाको नेतृत्वमा सरकार गठन गर्ने क्रममा कांग्रेस र एमालेबीच भएको सातबुँदे सहमतिमा संविधान बनेपछि राष्ट्रपति, उपराष्ट्रपति र सभामुखको निर्वाचन गर्ने र हालका राष्ट्रपति उपराष्ट्रपतिलाई संविधानसभा/व्यवस्थापिका संसदले अनुमोदन गर्ने उल्लेख छ । सहमति कार्यन्वयन नभएको भन्दै एमालेमा कांग्रेससँगको सत्ता साझेदारीबारे प्रश्न उठिरहेको छ ।
प्रकाशित मिति: 2014-06-01 07:15:33
प्रतिक्रिया: