ठुला सपनाको लागि ठुलै चुनौतीको सामना गर्नुपर्छ
सुजन जोशी / 2014-06-23 22:22:41
ठुला सपना देख्नु सायद ठुलो सफलताको पहिलो पाइला पनि हो । म पनि यो कुरालाइ हृदय देखी नै आत्मसाथ गर्दछु र साथै ठुला सपनाले दिन सक्ने ठुला समस्या , ठुलो चोटको लागि पनि मानसिक, शारिरीक रुपमा तयारी अबस्थामा रहनु पर्दछ । सायदै बिदेशमा आएर संघर्ष बिना सफलता पाएका कोहि होलान् । आजकल पत्रपत्रिका,अनलाईन, सामाजिक संजालहरुमा बिभिन्न किसिमका निराशाजनक लेख समाचारहरु आउन थालेका छन् ।
जापानमा पनि बढ्दो नेपाली समाज संगै बिभिन्न किसिमका समस्याहरु पनि देखिदै आएको छ । केहि बर्ष देखि आत्महत्याका घटनाहरु पनि बढिरहेका छन । केही समय अगाडी एक सातामै २ जना नेपाली बिद्यार्थीले आत्महत्या गरे।उसो त,जापान संसारमै नै सबैभन्दा बढि आत्महत्या गर्ने देशमा पर्दछ ।तथ्यांक कुरा गर्ने हो भने सायद बिदेशमा नेपालीहरुले गर्ने आत्महत्याको सवालमा जापान नै अग्रपंत्तिमा आउंछ होला।
जापान जतिसुकै बिकसित भएपनि अझै जापानीहरुको बिदेशिहरुलाइ हेर्ने नजर बिकसित भएको छैन । कतिपय शंकास्पद घटनाहरु पनि आत्महत्या भनि झिसमिस पारिएको हल्ला पनि चल्ने गरेको छ । सायद यो मेरो भ्रम पनि हुन सक्छ तर निर्दोष नेपाली गोबिन्द मैनाली १५ बर्ष जेलको कालकोठरीमा बिताएको हामी कहां बिर्सन सक्छौ र ? हुनत यै देशको नागरिक पनि बिना कशुर ४८ बर्षको जेल जिबन बिताइ केहि दिन अघि मात्रै निर्दोष ठहरि छुटेको समाचार पनि आएको थियो । जे होस घटनाहरुको अझै गम्भिरता पुर्बक छानबिन गर्न, गराउन नेपाली समाज अझै सक्रिय हुनुपर्ने आबश्यकता छ।
हामी नेपाली जुनसुकै रुपमा बिदेशिए पनि सबैको पहिलो प्राथमिकता अर्थोपार्जन नै हो । बिधार्थी जीबनमा स्कुल फिस तिर्दै आफ्नो दैनिक खर्च सहित केहि बचत गरेर नेपाल पठाउनु सजिलो छैन । ऋणधन गरि बिदेशिएका हामी नेपाली बिद्यार्थीको पहिलो प्राथमिकता नै कसरी हुन्छ छिटो भन्दा छिटो आफु बिदेशिदा लागेको खर्च पठाइ परिवारको समस्या घटाउने भन्नेमा नै केन्द्रित हुदा , पढाइबाट ध्यान हट्दै जान्छ र जापान जस्तो अंग्रेजी भाषा नचल्ने मुलुकहरुमा भाषा अध्ययनमा जोड नदिइ पैसा कमाउन तिर मात्र लाग्दा क्षणिक रुपमा फाइदा देखिए पनि भाषाको कमिले लामो जापान बसाइको क्रममा पर्न सक्ने समस्याहरुलाइ नजरअन्दाज गर्नु बिल्कुल गलत छ । मेरो आफ्नो अनुभबमा सुरुमा जापानको खान्जी हामीलाइ किन चाहियो ? केहि समय बस्नको लागी बोल्न जाने पुगी हाल्यो नि भन्ने किसिमका बिचारले खान्जीको अध्ययन नगर्दा बिश्वबिद्यालयमा अध्ययन गर्ने क्रममा धेरै समस्या आउने गर्दछ । सुरुमा जापानको जिबनशैली देख्दा यस्तो देशमा पनि को धेरै बस्ला भनि फर्किने दिन गन्दै बस्ने र आफुले सोचेको जस्तो नभइ फर्किन चाहेको बेलामा फर्किन नसक्दा फ्रस्टेसन हुने गर्दछ ।जुनसुकै देश किन नहोस बिदेश भनेको दलदल हो । नेपालबाट बिदेश जान जति गाह्रो छ त्यो भन्दा धेरै गाह्रो बिदेश बाट नेपाल फर्किनु हुन्छ । त्यसैले छोटो समय बस्ने सोचाइ होस लामो समय बस्ने सोचाइ होस । सम्बन्धित देशको भाषा संस्कृति रहनसहनमा सामान्य दख्खल राख्नु ने उत्तम हुन्छ।
अन्त्यमा मुलत: भाषा बिध्यार्थीको रुपमा जापान आउन लाग्नु भएकाहरु जापानको बारेमा राम्रो संग सोधपुछ गरि बुझेर मात्र आउनुहोला। म कुन शहरको, कुन ठाउंमा जांदैछु बुझेर आउनुहोला। अहिले ईन्टरनेटको माध्यमबाट बिश्वको कुनै पनि कुनाको जानकारी तुरुन्त पाउन सकिन्छ। र आइ सक्नु भएकाहरु कामलाइ सानो ठुलो नसोचि आर्थिक अबस्थाको साथसाथै भाषालाइ पनि बलियो बनाउदै लैजानुहोला र सबैभन्दा महत्वपूर्ण यदि दु:ख पाउनु भएको छ भने तपाइ मात्र होइन । यहा प्राय: सबैले दु:ख पाएका छन।जापानीहरु दिनमा १८ घन्टासम्म काम गर्छन। तपाइले -३°मा काम गर्नु भएको छ भने -१५° मा काम गर्ने हरु पनि छन भनि सोच्नुहोस। हिम्मत नहार्नुहोला ।
गान्बात्ते कुदासाइ ...
(लेखक नेपाल जनसम्पर्क समिति, जापानको पुर्ब सह-महामन्त्री हुन)
प्रकाशित मिति: 2014-06-23 22:22:41
प्रतिक्रिया: