नीति तथा कार्यक्रम माथि संसदमा आजदेखि छलफल हुने
Admin / 2014-07-01 03:38:23
नेपाल ब्युरो–असार १७, काठमाडौँ ।
सरकारले घोषणा गरेको नीति तथा कार्यक्रम माथि ब्यवस्थापिका संसदमा आजदेखि छलफल हुँदैछ ।
राष्ट्रपति डा. रामवरण यादवले व्यवस्थापिका–संसदमा प्रस्तुत गर्नुभएको सरकारको आगामी आर्थिक वर्ष २०७१ /०७२ को नीति तथा कार्यक्रममाथि आज छलफलको कार्यक्रम राखेको संसद सचिवालयले जनाएको छ ।
संसद सचिवालयका प्रवक्ता मुकुन्द शर्माले भोलि र पर्सी छलफल सकिएपछि सरकारी जिज्ञासा सहित पारित गरिने बताउनुभयो । सभासदहरुले उठाएका प्रश्नको कार्यवाहक प्रधानमन्त्री एवम् गृहमन्त्री बामेदव गौतमले जवाफ दिनुहुनेछ ।
यसैवीच व्यवस्थापिका संसद अन्तर्गतको सार्वजनिक लेखा समितिको बैठकमा आजपनि विद्युत खरिद सम्झौता पीपीएका विषयमा छलफल भइरहेको छ ।
सिंहदरबारमा जारी बैठकमा विद्युत खरिद सम्झौता पीपीए अमेरिकी डलरमा गर्नु पर्नाको कारणका विषयमा छलफल भइरहेको हो ।
स्वदेशी खपतका लागि उत्पादन हुने विद्युतको अमेरिकी डलरमा पीपीए गर्दा नेपाल विद्युत प्राधिकरणको वित्तीय अवस्था झनै कमजोर बन्ने भन्दै समितिले अहिलेसम्म भएका पीपीएको विवरण यसअघि नै माग गरिसकेको थियो ।
समितिको बैठकमा अधिकांश सभासदहरुले डलरमा गरिएको पीपीएको कडा आलोचना गर्दै आगामी दिनमा पनि जुन पायो त्यही आयोजनाको अमेरिकी डलरमा पीपीए गर्दै जाँदा प्राधिकरणको वित्तीय अवस्था थप धराशायी बन्ने जिकिर गरेका छन् ।
२०५६ सालसम्म नाफामा रहेको प्राधिकरणले भोटेकोशी र खिम्ती आयोजनासँग डलरमा पीपीए गरेपछि घाटामा जान लागेको सभासदको भनाई छ । सभासदहरुले डलरमा पीपीए गर्ने कार्यले प्राधिकरणको मात्र नभई देशकै अर्थतन्त्रमा प्रहार गर्ने समेत धारणा राखेका छन् ।
प्रकाशित मिति: 2014-07-01 03:38:23
प्रतिक्रिया: