ब्रासिलिया-
गोन्जालो हिग्विनको सानदार गोलमा बेल्जियमको चुनौतीलाई १–० ले
पन्छाउदै अर्जेन्टिना २४ वर्षपछि विश्वकप फुटबलको सेमिफाइनल पुगेको छ।खेलको आठौं मिनेटमा
नेपोलीका स्ट्राइकर हिग्विनले गरेको गोल अर्जेन्टिनालाई विजय दिलाउन पर्याप्त भयो।
बेल्जियमा कप्तान भिन्सेन्ट कोम्पनीले दिएको पास खोसेर एन्जल डी मारियाले दिएको क्रस
बेल्जियमका रक्षकको खुट्टामा लागेर हिग्विनकहाँ पुग्यो। उनले पहिलो प्रहारमै भलीबाट
गोल गरे।
दक्षिण
अफ्रिकामा भएको पछिल्लो विश्वकपमा अर्जेन्टिनाबाट सबैभन्दा बढी ४ गोल गरेका रियाल मड्रिडका
पूर्वस्टार हिग्विनको जारी प्रतियोगितामा पहिलो गोल हो। यसअघिका खेलमा गोल गर्न नसक्दा
अर्जेन्टिनी सञ्चारमाध्यममा आलोचनाको पात्र बनिरहँदा प्रशिक्षक एलेसान्द्रो साबेलाले
मिहिनेती खेलाडी भन्दै २६ वर्षे हिग्विनको बचाउ गरेका थिए।
गत सिजनमा
नेपोलीबाट इटालियन सिरी ‘ए’ मा १७ गोल गरेका हिग्विनको राष्ट्रिय टोलीबाट २२औं गोल हो। उनले दोस्रो
हाफमा गरेको अर्को प्रहार पोस्टमा लागेर बाहिरिएको थियो। म्यान अफ द म्याचमा चुनिएका
हिग्विन ८१औं मिनेटमा बाहिरिए। अर्जेन्टिनाले जितेको यसअघिको चार खेलका म्यान अफ द
म्याच लियोनल मेसीले इन्जुरी टाइममा अर्जेन्टिनाको अग्रता दोब्बर बनाउने मौका पाए।
तर वान भर्सेज वानमा मेसीको प्रहार थिबाउ कोर्टिउसले बचाउ गरेका थिए।
बेल्जियमले
खासै राम्रो मुभहरू बनाउन सकेन। गत सिजनमा एभर्टनबाट राम्रो प्रभाव देखाएका चेल्सीका
स्ट्राइकर रोमेलु लुकाकु दोस्रो हाफमा मैदान छिरे पनि अर्जेन्टिनाको रक्षापंक्ति बेल्जियमका
खेलाडीलाई पहाड बनेको थियो। काउन्टर एट्याकमा गोल गर्न अगाडि बढेका डी मारिया घाइते
भएर मैदान छाड्नु अर्जेन्टिनाका लागि दुर्भाग्य थियो।
अर्जेन्टिनाले
नेदरल्यान्ड्स र कोस्टारिकाबीचको विजेतासँग सेमिफाइनल खेल्नेछ। जर्मनी र आयोजक ब्राजिल
यसअघि नै सेमिफाइनल पुगिसकेका छन्। ब्राजिल र अर्जेन्टिना एकै विश्वकपको सेमिफाइनल
पुगेको यो पहिलो अवसर हो।
अर्जेन्टिना
पछिल्लोपल्ट १९९० को इटाली विश्वकपमा सेमिफाइनल पुगेको थियो। त्यसयता टोली ५ मध्ये
३ पटक क्वार्टरफाइनलमा पराजित भयो। पछिल्लो दुई संस्करणको क्वार्टरफाइनलमा जर्मनीले
अर्जेन्टिनालाई घर पठाइदिएको थियो। सन् १९८६ को विश्वकप जित्दा अर्जेन्टिनाले महान
डिएगो म्याराडोनाको दुई अविस्मरणीय गोलमा बेल्जियमलाई २–० ले
पराजित गरेको थियो। त्यसयता बेल्जियम पहिलोपल्ट क्वार्टरफाइनल पुगेको हो।