महाबिर पुनलाई 'जोनाथन बी पोस्टल अवार्ड'
Admin / 2014-07-25 03:24:05
म्याग्दी, श्रावण ९ - दुर्गम पहाडी बस्तीमा डिजिटल साक्षरता र सूचना प्रविधि विकासमा योगदान पुर्याएबापत महावीर पुनले अर्को अन्तर्राष्ट्रिय प्रसिद्धिको पुरस्कार प्राप्त गरेका छन् । द इन्टरनेट सोसाइटीले उनलाई सन् २०१४ को 'जोनाथन बी पोस्टल अवार्ड' प्रदान गर्ने भएको हो । पुरस्कारको राशि २० हजार अमेरिकी डलर छ ।
सोसाइटीअन्तर्गतकै इन्टरनेट इन्जिनियरिङ टाक्सफोर्सको क्यानडाको टोरोन्टोमा जारी ९० औं सम्मेलनमा बिहीबार छनोट समितिको निर्णय सार्वजनिक गरिएको हो । पुन पुरस्कार थाप्न सम्मेलनस्थल पुगिसकेका छन् ।
पुनले यसअघि एसियाको नोबेल पुरस्कार मानिने रोमन म्यागासेसे अवार्ड पाइसकेका हुन् । नेपाल वायरलेस नेटवर्क परियोजनाका अध्यक्ष उनकै सक्रियतामा देशका १५ दुर्गम जिल्लाका १७५ ग्रामीण बस्तीमा ताररहित इन्टरनेट सेवा पुगेको छ ।
'पुरस्कार राशि नेपालको दुर्गम बस्तीमा डिजिटल साक्षरता विस्तार र सूचना प्रविधिलाई ग्रामीण जनताका लागि जीवन उपयोगी बनाउन खर्च गर्नेछु,' उनले इन्टरनेटमै कुरा गर्दै भने, 'पुरस्कारले थप काम गर्ने जिम्मेवारी र दायित्व बढाएको महसुस भइरहेको छ ।'
'महावीर पुनले नेपालका लागि बृहत् योगदान पुर्याएका छन्, जसले त्यहाँका जनताका लागि सधैं गहन अर्थ राख्नेछ,' द इन्टरनेट सोसाइटीकी अध्यक्ष एवम् प्रमुख कार्यकारी अधिकृत क्याथी ब्राउनले विज्ञप्तिमा भनेकी छन्, 'उनले ठूला चुनौतीहरू मोले । यो अवार्ड उनको त्यही लगावको एउटा कदर हो ।'
सन् २००७ मा म्यागासेसे पुरस्कार प्राप्तिपछि पुनको योगदान अन्तर्राष्ट्रियस्तरमा चर्चाको विषय बन्दै आएको छ । त्यसअघि उनी सन् २००४ मा बेलायतको 'ग्लोबल आइडिया बैंक' नामक संस्थाद्वारा 'ओभरअल सोसियल इनोभेसन अवार्ड' बाट सम्मानित भएका थिए ।
म्याग्दी, राम्चे-२, नागीमा जन्मेका पुनले निम्नमाध्यमिक विद्यालय तहसम्मको पढाइ गाउँमै, चितवनकै खैरेनी माविबाट विसं २०२७ मा एसएलसी र २०३० मा अमृत साइन्स क्याम्पसबाट बीएस्सी उत्तीर्ण गरेका हुन् ।
उनले सन् २००२ मा '८०२.११ डिभाइस' प्रयोग गरी पोखराबाट म्याग्दीको नागीसम्म वायरलेस पुर्याएर डिजिटल साक्षरता अभियान सुरु गरेका थिए । उनको टिमले सुरुमा बेतारे इन्टरनेट सञ्जाल निर्माण गर्न टेलिभिजनका डिस एन्टेना, गाउँमै मिल्काइएका सिलट र स्टिलका सामग्री उपयोग गरेको थियो । 'डाटा कम्युनिकेसन' को क्षेत्रमा उल्लेख्य योगदान पुर्याउने व्यक्ति वा संस्थाहरूलाई सम्मान गर्न द इन्टरनेट सोसाइटीले पोस्टल अवार्ड स्थापना गरेको हो । पुरस्कारमा नगदबाहेक आकर्षक क्रिस्टल ग्लोब ट्रफीसमेत संलग्न छ । उक्त संस्था इन्टरनेटसम्बन्धी जानकारी र सोच नेतृत्वका लागि विश्वमै विश्वसनीय स्वतन्त्र स्रोत मानिन्छ । पुनलाई यस वर्षको संस्करणका निम्ति पूर्वविजेतासहितको अन्तर्राष्ट्रिय कमिटीले छनोट गरेको हो ।
प्रकाशित मिति: 2014-07-25 03:24:05
प्रतिक्रिया: