जस्ताको छानो अनि छानोमा सोलार
Admin / 2014-07-26 08:04:36
चितवन-प्राथमिक विद्यालयको भवनबाहेक गाउँमा जस्ताले छाएको कुनै घर थिएन। तर, अहिले अवस्था भिन्न छ। गाउँका घर धमाधम जस्ताले छाउन थालिएको छ। नयाँ छानोसँगै घरघरमा सोलार बत्ती पनि जडान भएको छ। लोथर– ९ मा पर्ने विपन्न चेपाङ समुदायमात्र बस्ने कान्दा गाउँ अहिले दिउँसो टल्कने र राति चम्कने भएको छ।
कान्दाका रत्नबहादुर चेपाङ पुस्तौंदेखि सामान्य छाप्रोमा बस्दै आएका थिए। तर, यो फागुनदेखि उनी ढुंगाको गाह्रो र टिनको छानो भएको चिटिक्कको घरमा बस्न लागेका छन्। उनको घरमा सोलार पनि छ। अहिलेसम्म टुकीसमेत नसल्काएका रत्नबहादुरलाई रातमा घरभित्र झलमल्ल सोलार बत्ती बल्दा सपना देखेको हो कि विपनामै छु भन्ने लाग्ने गर्छ।
कान्दाका सबैको कथा एउटै छ। एक वर्षको बीचमा दुई छोरा गुमाएका काठमाडौंका विष्णु गौतमको पहलमा चेपाङलाई नयाँ घर र सोलारको व्यवस्था गरिएको हो। ‘जब म त्यो गाउँमा पुगे त्यहाँ वर्षाको पानी राम्रोसँग छेक्ने छानो र जाडोमा सिरेठो छेक्ने गाह्रो भएको घर एउटा पनि थिएन। रातमा टुकी बाल्ने चलन रहेनछ। अँगेनाको उज्यालोले काम चलाउने,' गौतमले भने।
दिंवगत छोराहरुको स्मृतिमा गौतमले लक्ष्मी प्रतिष्ठान नामक संस्था खोलेर काभ्रे र नुवाकोटमा शिक्षा र सीप विकासका कार्यक्रम गर्दै आएका छन्। ‘अमेरिका, बेलायत इजरायल र काठमाडौंमा रहेका साथीले पनि घर बनाउन पैसा दिए। सबैको सहयोगले अहिलेसम्म ३२ वटा घर बनेका छन्,' गौतमले भने। कान्दा र त्यस वरपर ८५ घर छन्। आउँदो दुई वर्षभित्र सबै घरमा जस्ताले छाउने उनको लक्ष्य छ। सोलार बत्ती ८५ मध्ये ७५ घरमा पुगेको छ।
प्रकाशित मिति: 2014-07-26 08:04:36
प्रतिक्रिया: