तोकिएकै समयमा संबिधानको मस्यौदा तयार हुने दाबी
संघियता राज्य पुर्नसंरचनाको विषयमा छलफल हुन बांकी
Admin / 2014-08-01 21:33:27
काठमाडौं : संविधानसभा मातहतका महत्वपूर्ण समिति संवैधानिक राजनैतिक संवाद समिति तथा संविधान मस्यौदा समितिका सभापतिहरुले संविधान निर्माणले फड्को मारेको बताएका छन्। उनीहरुले संविधान निर्माणको काम कार्यतालिका अनुसार भइरहेको भन्दै एक महिनाको अविधिमा परिणाम देखिन थाल्ने दाबी गरेका छन्।
शुक्रबार संविधानसभा भवन नयाँ बानेश्वरमा पत्रकार सम्मेलन गरि संवैधानिक राजनीतिक संवाद तथा सहमति समितिका सभापति बाबुराम भट्टराईले एक महिनाभित्रै शासकीय स्वरुप, संघीयता लगायतका मुख्य विवादित विषयमा सहमति जुट्ने बताएका छन्।
त्यस्तै शुक्रबार नै संविधान मस्यौदा समितिका सभापति कृष्ण सिटौलाले पनि संविधान निर्माणले फड्को मारेको बताएका छन्। उनले संवाद समितिले सहमति गरेर पठाएको एक साता भित्रै समितिले मस्यौदा तयार गर्ने प्रष्ट पारे।
के गर्दैछ संवैधानिक राजनैतिक समिति
संवैधानिक राजनैतिक संवाद समिति संविधानका कतिपय विषयमा असहमत दलहरुका दलीय सैद्धान्तिक अडानलाई लिखित रुपमा राख्ने तर संविधान निर्माणमा व्यवधान नगर्ने गरी अगाडि बढेको छ। समितिका सभापति बाबुराम भट्टराईले शुक्रबार मुख्य विवादित विषयमा कुराकानी थालिएकाले सहमतिको वातावरण बन्दै गएको बताएका छन्।
'संविधानका कतिपय विषयमा असहमत दलहरुका दलीय सैद्धान्तिक अडानलाई लिखित रुपमा राख्ने तर संविधान निर्माणमा व्यवधान नगर्ने भन्नेमा दलहरु सहमत छन्,' भट्टराईले भने।
अघिल्लो संविधान सभाको विवाद समाधान उपसमितिले सहमति गरेर संवैधानिक समितिमा पेश गर्न बाँकी ४८ बुँदामा क्रमशः सहमति जुटाएर अनुमोदन गर्दै समिति अगाडि बढेको पनि उनले बताए। अघिल्लो संविधानसभाको राज्य पुनर्संरचना तथा राज्यशक्तिको बाँडफाँड समितिमा विवादित २५ प्रश्न बाँकी थिए। ती २५ बुँदामा सहमति जुटाएर साउन २० भित्र समितिमा पेश गर्न सद्भावना पार्टीका सभासद् लक्ष्मणलाल कर्णको संयोजकत्वमा ८ सदस्यीय समिति गठन गरिएको छ।
साथै समिति अन्तर्गतकै प्रारम्भिक वार्ता उपसमितिले विभिन्न सात सशस्त्र समूह तथा संविधानसभा बाहिरका दलसँग पनि छलफल गरी सहमति जुटाएकाले माघ ८ मा संविधान जारी हुने वातावरण बनेको भट्टराईले स्पष्ट पारे।
संविधानको मस्यौदा तयार हुँदै
संविधानको मस्यौदा तयार पार्ने जिम्मा पाएको संवैधानिक मस्यौदा समितिले संविधानको प्रस्तावना र परिभाषा, मौलिक हक, राज्यको निर्देशक सिद्धान्त लगायतका बिषयमा मस्यौदा तयार पारिसकेको छ। समितिले संवैधानिक अभिलेख अध्ययन तथा निर्क्यौल समितिले सहमति गरि संविधानसभामा प्रारम्भिक छलफल पछि प्राप्त बिषयमा आधारित भएर मस्यौदा तयार गरेको हो।
समिति मातहतमा दुई महिना अघि गठन भएका विभिन्न उपसमितिले मस्यौदाको खाका तयार गरि समितिमा पेश गरेका हुन्। समितिका सभापति कृष्ण सिटौलाले संवैधानिक राजनैतिक संवाद समितिमा छिट्टै सहमति हुने आफूले बुझेको उल्लेख गर्दै समयसीमा भित्रै मस्यौदा तयार हुने बताए।
'संवाद समितिमा सहमति हुनासाथ फास्ट ट्रयाकमा मस्यौदा समितिले मस्यौदा तयार पार्ने काम गर्छ,' सिटौलाले भने, 'संवाद समितिले सहमति गरेर सबै विषय पठाए सात दिनभित्र मस्यौदा तयार गर्न सकिन्छ।'
संविधान निर्माणको सवालमा विवाद हल गर्ने र मस्यौदा लेखन गर्ने मुख्य जिम्मेवारी पाएका समितिका दुवै सभापति माघ ८ को समय सिमामा संविधान जारी हुनेमा विश्वस्त देखिएका छन्।
तर महत्वपूर्ण र विगतको संविधानसभाको विघटनको प्रमुख कारकको रुपमा रहेका संघियता राज्य पुर्नसंरचना लगायतका विषयमा भने दलहरु बीच अहिलसम्म छलफल भएको छैन।
प्रकाशित मिति: 2014-08-01 21:33:27
प्रतिक्रिया: