एमालेको महाधिवेशनको आज औपचारिक समापन हुँदै
Admin / 2014-07-17 03:20:13
नेपाल ब्युरो–साउन १, काठमाडौँ ।
दुई सातासम्म राजधानीमा चलेको सत्तासाझेदार दल नेकपा एमालेको नवौं महाधिवेशनमा चार करोडभन्दा बढी खर्च भएको छ ।
महाधिवेशन पूर्वनिर्धारित तालिकाभन्दा झण्डै एक हप्ता लम्बिएकोले पहिले अनुमान गरिएभन्दा बढी खर्च भएको महाधिवेशन व्यवस्थापन अन्तर्गत आर्थिक उपसमितिले जानकारी दिएको छ ।
दुई हप्तासम्म चलेको यो महाधिवेशन अहिलेसम्मकै लामो महाधिवेशन हो । असार १९ गते सुरु भएको महाधिवेशन असार २५ गते नै सकाउने पूर्वनिर्धारित तालिका तय गरिएको थियो । सुरुमा विद्युतीय मतदान गर्ने भनी प्रचार गरिए पनि अन्तिम क्षणमा माधव नेपाल पक्षले शंका व्यक्त गर्दै विरोध गरेपछि परम्परागत मतदान प्रणाली नै अपनाइएको थियो । पहिले नै तयारी गरिएको विद्युतीय मतदान नहुँदा पनि महाधिवेशनको अवधि लम्बिएको र खर्च पनि बढेको छ ।
यसैबीच महाधिवेशनको आज औपचारिक समापन हुँदैछ । केपी शर्मा ओलीको नेतृत्वमा १४ पदाधिकारी र १ सय ५१ केन्द्रीय सदस्य निर्वाचित गरेर यो महाधिवेशन सकिदैछ । झण्डै दुई दसकपछि एमालेको मूल नेतृत्व हस्तानान्तरण भएको छ । यसअघि पटक पटक ओलीले नेतृत्व हस्तानान्तरणलाई मुख्य मुद्दाको रुपमा अघि सार्दै आउनुभएकाृ थियो । नयाँ नेतृत्वको घोषणासभा आज बिहीबार दिउँसो १ बजे पाटी केन्द्रीय कार्यालय बल्खुमा आयोजना गरिएको छ ।
घोषणासभालाई नवनिर्वाचित अध्यक्ष केपी शर्मा ओली, निवर्तमान अध्यक्ष झलनाथ खनाल, पूर्वप्रधानमन्त्रीसमेत रहनुभएका एमाले नेता माधवकुमार नेपाललगायतका नेताहरुले सम्बोधन गर्नुहुने एमालेले जनाएको छ । घोषणासभा अघि निर्वाचन आयोगबाट विजयी उम्मेदवारहरुको औपचारिक घोषणा, प्रमाणपत्र वितरण, शपथग्रहण तथा पदभारको कार्यक्रम तय गरिएको छ । यो महाधिवेशनमा एमालेका दुई हजारभन्दा बढी प्रतिनिधि सहभागी भएका थिए ।
प्रकाशित मिति: 2014-07-17 03:20:13
प्रतिक्रिया: