माग पूरा नभए अनिश्चितकालिन रसुवा बन्द गर्ने चेतावनी
Admin / 2014-08-19 06:09:12
नेपाल ब्युरो–भदौ ३, काठमाडौ । चिलिमे जलविद्युतका प्रबन्धक संचालक कुलमान घिसिङलाई हटाउने निर्णलाई छिटो भन्दा छिटो फिर्ता लिन रसुवाका स्थनायिले माग गरेका छन् ।
आफुहरुले गरेको माग फिर्ता नलिए आउँदो भदौ ६ गतेबाट अनिश्चितकालिन रसुवा बन्द गर्ने चेतावनी पनि उनिहरुले दिएका छन् ।
आज राजधानीमा पत्रकार सम्मेलन आयोजना गर्दै उनीहरुले गृह र उर्जामन्त्रीको ठाडो हस्तक्षेप भएको भन्दै निर्णय फिर्ता नलिए अनिश्चितकालिन रसुवा बन्द गर्ने चेतावनी दिएका हुन् ।
उनीहरुले चिलिमे राष्ट्रकै नमूना हाईड्रो पावरका रुपमा परिचित भएकाले यसको छवीलाई धुमिल्याउने जो कोहीका विरुद्धमा पनि रसुवाली जनताहरु लड्ने उद्घोष गर्दै आफूहरु कम्पनीको छवीलाई बचाउन लागिपरेको बताएका छन् । शान्तिपूर्ण आन्दोलन गरिरहेको वेला आन्दोलनकारीहरुलाई जबरजस्ती प्रहरी हिरासतमा लिने काम गरेर जनताको विरुद्धमा गृहमन्त्री नै खनिएको आरोप समेत लगाएका छन् ।
सवै पार्टीको सहभागीता रहेको संयुक्त पत्रकार सम्मेलनमा नेपाली काँग्रेसका जिल्ला सभापति ल्हामा कार्पु तामाङ्ले चिलिमे जलविद्युत कम्पनीका प्रबन्ध संचालक कुलमान घिसिङलाई हटाउने निर्णयका विरुद्ध आफूहरु आन्दोलनमा उत्रिरहेको वेला राज्यले जनतालाई आतंकित बनाएर मुठभेड सिर्जना गरेको बताउनुभयो ।
त्यस्तै एकिकृत माओवादीका पूर्व सभासद प्रेम बहादुर तामाङ्ले रसुवाली जनता कुलमान घिसिङ्को पक्षमा भन्दा पनि नेपालमा हाईड्रो पावर बचाउनु पर्छ भन्ने हेतुका कारण उर्जामन्त्रालयको विरोधमा शान्तिपूर्ण आन्दोलनमा उत्रिएको दावी गर्नुभयो । तामाङ्ले सडक देखि सदनसम्म पनि यो विषयमा कुरा उठिसकेको बताउँदै यो आन्दोलनलाई छाँयामा पार्न गृहमन्त्री लागिपरेको आरोप पनि लगाउनुभयो ।
कार्यक्रममा सहभागी अन्य दलका नेता कार्यकर्ताले आफ्ना माँगको सुनुवाई नभए कडा भन्दा कडा संघर्षमा उत्रने चेतावनी दिएका छन् ।
प्रकाशित मिति: 2014-08-19 06:09:12
प्रतिक्रिया: