टोकियो,जापान।
नेपाली जनसम्पर्क समिति, जापानको महाधिबेशनमा निर्बाचित कार्य समितिको आज औपचारिक घोषणा गरिएको छ ।टोकियोमा आयोजित विशेष समारोहकाबीच नयाँ कार्यसमितिको औपचारिक घोषणा र पदभार हस्तान्तरण गरिएको हो । गएको मे २५ मा भएको निर्वाचनबाट निर्वाचित भएको नारायणप्रसाद सुवेदी नेतृत्वको कार्यसमितिलाई औपचारिक रुपमा जिम्मेवारी हस्तान्तरण गरिएको हो ।
मतदानमा समान ८९ मत पाएका वासुदेव बास्ताकोटी र सुजन श्रेष्ठ दुवैलाई समितिमा समावेश गरी ३० सदस्यीय कार्यसमिति घोषणा गरिएको छ । ६ जना सदस्य भने निर्वाचित कार्यसमितिले पछि मनोनित गर्ने छ ।
घोषणासभामा नेपाली काँग्रेसका केन्द्रीय सदस्य तथा सहरी विकासमन्त्री डा.नारायण खड्का, जनसम्पर्क समिति समन्वय समिति प्रमुख तथा पार्टी केन्द्रीय सदस्य अर्जुनप्रसाद जोशी सहभागी थिए ।
यस्तै जापानका लागि नेपाली राजदूत मदनकुमार भट्टराई, एनआरएन जापानका अध्यक्ष पारसमणि पोखरेल, नेपाल पत्रकार महासंघ जापान शाखाका अध्यक्ष तिलक मल्ल, जापानमा रहेका विभिन्न नेपाली संघ संस्थाका प्रतिनिधि लगायतको सहभागीता थियो ।