टोक्यो । गैर आवासिय नेपाली संघ (एनआरएन) को
कार्यक्रमका लागि जापान आएका नेपाल पत्रकार महासंघका सचिव प्रभात चलाउनेसहितको
महासंघको टोली र जापान न्युज पेपर एण्ड अडिटर्स एशोसिएसन (निहोन सिम्बून क्योकाई)
बीच भेटवार्ता भएको छ ।
भेटवार्तामा जापान र नेपालका दुई देशका छापा, अनलाईन, एफएम र टेलिभिजन लगायतका सञ्चारमाध्यमहरुको पछिल्लो
अवस्था, पाठकको चाहनाबारे जानकारी
आदानप्रदान गरिएको थियो । सो अवसरमा महासंघका सचिव चलाउनेले जापानको प्रविधि र
विकासबाट नेपालका सञ्चारमाध्यमहरुले धेरै सिक्न आवश्यक रहेको बताए ।
उनले भेटवार्ता जापानको प्रेसबारे जानकारी प्राप्त भएको
भन्दै महासंघको तर्फबाट एशोसियसनलाई नेपाल भ्रमणको निम्तो समेत दिए । भेटका अवसरमा
उनले नेपालमा करिव ६ हजार पत्रिका दर्ता भएको र ३ हजार पत्रिका प्रकाशन भईरहेको, करिव ५४३ एफएम दर्ता भएको र ३६० जति प्रसारणमा रहेको, ७५ वटा टेलिभिजन दर्ता रहेको र करिव १८ टेलिभिजन
प्रसारण भइरहेको जानकारी दिए ।
यसै गरी उनले करिव पौने ३ करोड नेपालीहरुलाई देशबिदेश
गरी ११ हजार पत्रकारहरुले सूचनाको सेवा प्रदान गराउँदै आएको पनि बताए । यसैगरी
जापानको प्रेसको अवस्था बारे जानाकारी गराउँदै एसोसियशनका महासचिव इचिरो कोनोले
एशिया क्षेत्रका सबै पत्रकारहरुले शान्तिका लागि संगै मिलेर काम गर्नुपर्नेमा जोड
दिए ।
उनले नेपालका पत्रकारहरुसंग सम्बन्ध बढाउन चाहेको पनि
उल्लेख गरे । सो क्रममा उनले जापानमा अनलाईन मिडियाको विकासले छापा माध्यममा असर
परिरहेको र पछिल्लो समयमा युवाहरुको आकर्षण अनलाइनतिर नै बढि रहेका बताए ।
भेटमा नेपाल पत्रकार महासंघका केन्द्रीय कोषाध्यक्ष
सूर्यमणि गौतम, जापान शाखाका अध्यक्ष तिलक मल्ल, सदस्य कुमार मोत्तान, नेपाल आर्थिक पत्रकार समाज (सेजान) का अध्यक्ष विज्ञान
अधिकारी, आर्थिक पत्रिका कारोवार दैनिकका
सम्पादक सञ्जय न्यौपाने, नेपाल सन्देश डट कमका रविन्द्र
श्रेष्ठ, आउट लाइन न्यूज सर्भिसका
दाहाललगायतका पत्रकारहरु सहभागी थिए ।
टोक्योको खासुमीगासेकीस्थित जापान न्यूजपेपर एण्ड
एडिटर्स एसोसियशनको प्रधान कार्यालय रहेको निप्पोन प्रेस सेन्टरमा भएको भेटको
डा.भूपालमान श्रेष्ठले भाषा सहजीकरण गरेका थिए ।