जनजाति आन्दोलनको दुई महिने कार्यक्रम घोषणा
Admin / 2014-11-11 10:29:13
आदिवासी जनजाति राष्टिय आन्दोलन, नेपालले देशभर जन प्रदर्शनसहित सभा र जागरण अभियान संचालन गर्ने भएको छ । सार्क सम्मेलनका बेला आदिवासी जनजातिको भेषभूषा र प्ले कार्डसहित स्वागत र प्रदर्शन गर्ने कार्यक्रम तय भएको छ ।
आन्दोलनको तयारीबारे आन्दोलन केन्द्रिय निर्देशन समिति सदस्य पासाङ शेर्पाले भने, ‘जिल्ला जिल्लाबाट व्यापक समर्थन, सहयोग र सहभागिताका लागि उत्साहजनक तयारी भैरहेको छ । यो आन्दोलन ऐतिहासिक रुपमा सफल हुनेछ ।’ उनले थपे, ‘प्रवासमा रहेका जनजातिहरु पनि नैतिक, आर्थिक, बौद्धिक र भौतिक सहयोग गर्न रातदिन छलफलमा जुटिरहेका छन् । सबैको चासो, सहयोग, समर्थन, समन्वय र सहकार्यले हामीलाई आन्दोलनका लागि अझ बढी जोश, अझ बढी उमंग थपिएको छ र सफलताको ग्यारेन्टी भएको छ ।’
मंगलबार काठमाण्डौमा सम्पन्न समितिको बैठकबारे जानकारी दिदै शेर्पाले मंसीर र पुसभरका लागि दुई महिने आन्दोलनका कार्यक्रम तय गरिएको बताए ।
सार्क मुलुकका राष्ट प्रमुखहरुलाई नेपालका आदिवासी जनजातिका समस्याबारे जानकारी गराउन प्रदर्शन गरिने भएको छ । अधिकारवादी नेता पद्मरत्न तुलाधर नेतृत्वको आदिवासी जनजाति राष्टिय आन्दोलन, नेपालको अगुवाईमा सार्क मुलुकहरुको ध्यानाकर्षण गर्न शान्तिपूर्ण प्रदर्शन गरिनेछ । प्रदर्शन कुन ठाउँमा कसरी गर्ने भन्ने बारेमा भने केन्द्रीय कार्यालयले तय गर्नेछ ।
संविधानमा आदिवासी जनजाति अधिकार सुनिश्चित गराउन मंसीर महिनाभर जिल्लाव्यापी जागरण अभियान चलाइने छ । ५० भन्दा बढी जिल्लामा जनप्रदर्शन तथा सभा गरिने छ । जिल्लाजिल्लामा सभा गर्नका लागि केन्द्रीय निर्देशन समितिको तर्फबाट २० वटा टोली बनाइने छ । सो टोली गएर सभा गर्ने र जागरण अभियान सञ्चालन गरिने छ ।
यसपछि प्रादेशिक तहमा जनप्रदर्शनका साथै सभा गर्ने तयारी भएको छ । पुस महिनाभर प्रादेशिक सभाका लागि आवश्यक तयारी गर्न केन्द्रीय कार्यालयलाई निर्देशन दिइएको छ । उनले कार्यक्रमको विस्तृत खाका बुधबार तय हुने जानकारी दिएका छन् ।
प्रकाशित मिति: 2014-11-11 10:29:13
प्रतिक्रिया: