दार्चुला- भारतको धार्चुलामा पहिरो जाँदा आइबार एक नेपालीसहित छ जनाको मृत्यु भएको छ। अर्का एक नेपाली घाइते भएका छन्। पिथौरागढ जिल्लाको पांगला बयालघारमा पहिरोले पुरिएर बैतडी जिल्ला मठैराज गाविसका सोभान सिंह बोहराको मृत्यु भएको प्रहरीले जनाएको छ।
घाइते हुनेमा बेलापुर–९ डडेल्धुराका राजेश खड्का रहेको भारतीय प्रहरीलाई उद्धृत गर्दै जिल्ला प्रहरी कार्यालय दार्चुलाले जनाएको छ। भारतीय व्यापारी सुरेन्द्रसिंह बोहराको सामान लगेर मालपा जाँदै गरेको अवस्थामा दार्चुला सदरमुकामसँगै रहेको धार्चुलाबाट ३२ किलोमिटरको दूरीमा रहेको बयालघारमा माथिबाट पहिरो आएर उनीसँगै रहेका अन्य पाँच भारतीय नागरिकको मृत्यु भएको हो।
पहिरोमा परी एक दर्जन भारतीय घाइते भएको भारतीय प्रहरीले जनाएको छ। घाइते खड्का भारतको पागलामा होटलमा काम गर्थे। घाइतेलाई हेलिकप्टरबाट धार्चुला ल्याएर उपचारका लागि पिथौरागढ लगिएको छ। भारतमा निर्माण हुन लागेको सडकमा सयौं नेपाली काम गर्छन्। नेपालीले नै त्यस क्षेत्रमा व्यापारी तथा सैनिकहरुको भारी बोक्ने काम गर्छन्।
भारतीय पक्षले कालापानीसम्म सडक विस्तार गरिरहेकाले दुई-तीन वर्षयता त्यहाँ नियमित पहिरो आउने गरेको छ। दार्चुला तथा बैतडीका धेरै मानिसहरु आफ्नो घरधन्दा चलाउन सडक निर्माण तथा भारतीय व्यापारी तथा सेनाको सामान ढुवानी गर्ने गर्छन्।