सिन्धुपाल्चोकका पहिरोपीडितलाई हङकङ र कुवेतबाट आर्थिक सहयोग

नेपाल ब्युरो– भदौ ७, काठमाडौ । सुनकोशीका पहिरो पीडितहरूका लागि हङकङ घेदुङ र नेपाल तामाङ घेदुङ कुवेतले आज आर्थिक सहयोग प्रदान गरेको छ ।

संस्थाका प्रतिनिधिहरूले आज सिन्धुपाल्चोक पुगी राहत वितरण समितिलाई सङ्कलित रकम हस्तान्तरण गरेको हो । हङकङमा सङ्कलन भएको दुई लाख ५८ हजार आठ रुपैयाँ हङकङ घेदुङका उपाध्यक्ष सरस्वती घिसिङले र कुवेत घेदुङले सङ्कलन गरेको एक लाख २० हजार रुपैयाँ नेपाल तामाङ घेदुङका महासचिव कुमार ब्लोन तामाङ र सचिव प्रतीक ङेसुर तामाङले सिन्धुपाल्चोकमा जुरेमा रहेको राहत सङ्कलन केन्द्रमा पुगी प्रदान गर्नुभएको हो । सहयोग रकम राहत वितरण समितिका संयोजक मदनकुमार तामाङलाई प्रदान गरिएको हो ।

नेपालमा रहनुभएका हङकङका पदाधिकारीलाई सुनकोशी पु¥याउन काभ्रेका समाजसेवी डीबी मोक्तानले विशेष सहयोग गर्नुभएको थियो ।

राहत वितरण समितिका संयोजक तामाङले विदेशबाट समेत पीडितका लागि आर्थिक सहयोग उपलब्ध गराएकोमा धन्यवाद दिनुहुँदै अहिलेसम्ममा करिब एक करोड नगद सहयोगस्वरुप प्राप्त भएको जानकारी दिनुभयो ।

आर्थिक सहयोग हस्तान्तरण कार्यक्रममा नेपाल तामाङ घेदुङका केन्द्रीय अध्यक्ष कुमार योञ्जन तामाङ, केन्द्रीय सदस्य फुलकाजी लामा, तामाङ घेदुङ हङकङका कार्यसमिति सदस्य रोशनी स्याङबोको पनि उपस्थिति थियो ।

गएको साउन १७ गते जुरेमा आएको पहिरोबाट १५६ जनाको मृत्यु भएको थियो भने सयौं मानिस घरवारविहीन भएका थिए ।